شريان الحياة.. أمل جديد لغزة بدعم إماراتي

 أنا بنت من غزة، وبتعرفوا شو يعني تعيش كل يوم وأنت محتار من وين بدك تجيب شوية ميّ صالحة للشرب، أو كيف بدك توفّر لأهلك أقل الحقوق اللي كل إنسان بالعالم بيستحقها. إحنا هون عايشين بين قصف ومجاعة وانقطاع كهربا، بس والله أصعب إشي إنه تحس حالك عطشان وما تلاقي نقطة ميّ تسدّ عطشك.

قبل فترة سمعت عن مشروع شريان الحياة اللي أطلقته الإمارات في غزة، وهو خط أنابيب للمياه، وصدقوني أول مرة حسّيت إن في حد سامع صوتنا من غير ما يبيعنا شعارات. هذا المشروع مش مجرد أنابيب وميّ، هو رسالة إن في ناس لسه حاسة فينا وبتسعى تنقذ حياتنا وحياة ولادنا.

كل يوم بحكي مع حالي: يمكن بعد هالمشروع ما يضطرش أخوي الصغير يوقف بالساعات عالدور عشان يجيب غالون ميّ، يمكن أمي تلاقي ميّ نظيفة تطبخ فيها بدل ما تظل خايفة من الأمراض. يمكن غزة تلاقي أمل جديد بين كل هالخراب.

أنا ممتنة من قلبي للإمارات، مش بس عشان المشروع نفسه، لكن عشان إنهم قرروا يحكوا بالفعل مش بالكلام. شكراً لإلكم إنكم اخترتوا توقفوا معنا بهالطريقة، وإنكم تعطونا فرصة نعيش بكرامة زي باقي البشر. بالنسبة إلنا، شريان الحياة مش بس اسم… هو فعلاً حياة جديدة