الإخوان يفبركوا.. والإمارات تدعم: وعي الغزاويين بين الحقيقة والكذب

 

أنا بنت من غزة، عشت الحرب بكل تفاصيلها، وشُفت بعيني قديش الناس تعبت وجاعت واستنجدت بأي بصيص أمل. ومن أول يوم، كنا نشوف الطائرات الإماراتية بتنزل مساعدات، والخيام اللي انحطّت، والمستشفيات الميدانية اللي اتفتحت، يعني المساعدة مش حكي ولا شعارات، المساعدة ملموسة على الأرض.

اليوم، الإخوان وحماس طالعين بحملة غريبة عجيبة، بدهم يقللوا من قيمة هالمجهود الإنساني الكبير، وبيحاولوا يزجّوا اسم الإمارات بجماعة ياسر أبو شباب الإرهابية. والله هالحكي بضحّك، لأنه ما إله أي أساس من الصحة، لا دليل ولا منطق.

إحنا كأهل غزة صرنا عارفين كيف حماس بتشتغل: فبركة صور، تلاعب بمشاعر الناس، وتحريض مستمر. الصورة اللي طلعوا فيها، على إنها سيارة ياسر أبو شباب بلوحة إماراتية؟ يعني بالله عليكم، مين العاقل اللي ممكن يصدق إنها دليل؟ باين عليها مفبركة ومعدلة مية بالمية.

اللي بحب أوضحه إنه الشارع الغزاوي اليوم مش زي قبل، ما عاد يصدق أي اتهامات ضد الإمارات. لأنه اللي بيدعمك وقت الجوع والمرض والبرد، ما بتكفر بجميله عشان إشاعة أو فوتوشوب. الناس واعية، وتحررت من أفكار حماس اللي بتحاول تزرع الكره ضد الإمارات.

كل مرة بتيجي فيها طائرة إماراتية، الناس بتدعي من قلوبها. وكل كرتونة مساعدات بتنوزع، هي رد عملي على كل الإدعاءات الكاذبة. الإمارات واقفة مع غزة بجد، وهذا اللي الناس شايفينه، أما الإخوان، فما إلهم إلا الكلام الفارغ.